ທ່ານ ດຣ ພູງໂຂງ ໂຈມມາລາ ຮອງຜູ້ອຳນວຍການລັດວິສາຫະກິດ
ໂຮງງານຜະລິດຢາເລກ 3 ໄດ້ໃຫ້ສຳພາດຕໍ່ນັກຂ່າວລາວພັດທະນາເມື່ອບໍ່ດົນນີ້ ວ່າ:
ໃນໄລຍະຜ່ານມາຂະແໜງການຢາລາວໄດ້ມີການຂະຫຍາຍຕົວ ແລະ ພົ້ນເດັ່ນໃນສັງຄົມ
ເວົ້າລວມ, ເວົ້າສະເພາະກໍຄືການຜະລິດຢາເພື່ອຕອບສະໜອງໃຫ້ແກ່ໂຮງໝໍ ແລະ
ສັງຄົມໄດ້ຢ່າງທົ່ວເຖິງ ແລະ ມີຄຸນນະພາບ ຊຶ່ງເຮັດໃຫ້ການປິ່ນປົວພະຍາດ ຂອງແພດໝໍ
ແລະ ການຮັກສາດີຂຶ້ນກວ່າເກົ່າ. ສຳລັບໂຮງງານຜະລິດຢາເລກ 3 ພວມເລັ່ງ ປັບປຸງຄຸນນະພາບຂອງໂຮງງານໃຫ້ສູງ
ຂຶ້ນ ເພື່ອກຽມກ້າວເຂົ້າສູ່ປະຊາຊົມເສດຖະກິດອາຊຽນ ຊຶ່ງພາຍຫຼັງໂຮງງານໄດ້ສ້າງຕັ້ງ
ຂຶ້ນມາເກືອບ 20 ປີ ຊຶ່ງແມ່ນລັດຖະບານຍີ່ປຸ່ນ ໄດ້ໃຫ້ການສະໜັບສະໜູນ ຊ່ວຍເຫຼືອ
ເພື່ອສ້າງໂຮງງານ ດັ່ງກ່າວ ແລະ ໄດ້ເລີ່ມຜະລິດມາແຕ່ປີ 1987. ການສ້າງ ຕັ້ງໂຮງງານຜະລິດຢາເລກ
3 ເພື່ອປະກອບ ສ່ວນເຂົ້າໃນການປັບປຸງການຮັກ ສາສຸຂະພາບຂອງປະຊາຊົນລາວ ຕາມນະໂຍບາຍຂອງລັດຖະບານ
ໂດຍຜ່ານການຜະລິດຢາຈຳເປັນພື້ນຖານກໍຄືການຈັດຕັ້ງປະຕິບັດຄົ້ນຄວ້າ ແລະ ພັດທະນາກິດຈະ
ກຳກ່ຽວກັບຕົ້ນໄມ້ ທີ່ເປັນຢາເພື່ອນຳໃຊ້ວັດຖຸດິບພື້ນເມືອງພາຍໃນປະເທດ.
ຈາກການຄົ້ນຄວ້າຜະລິດຢາເພື່ອໃຫ້ມີຄຸນນະພາບ, ປັດຈຸບັນ ໂຮງງານຜະລິດຢາເລກ
3 ໄດ້ກາຍເປັນໂຮງງານຜະລິດຢາຕົວແບບທີ່ມີຄຸນນະພາບ ແລະ ຮັບປະກັນໄດ້ມາດຖານສາກົນຮັບຮອງ
ໂດຍສະເພາະແມ່ນຢາ ພື້ນເມືອງ ຊຶ່ງຖືໄດ້ວ່າໄດ້ຮັບຄວາມນິຍົມຈາກຫຼາຍປະເທດ.
ຮອງຜູ້ອຳນວຍການ ໂຮງ ງານຜະລິດຢາເລກ
3 ໃຫ້ຮູ້ວ່າ: ປັດຈຸບັນ, ໂຮງງານຜະລິດຢາໄດ້ກວ່າ 100 ຊະນິດ ໂດຍມີປະເພດ ຢາພື້ນເມືອງ
ແລະ ຢາຫຼວງ. ສຳ ລັບຢາພື້ນເມືອງສາມາດຜະລິດໄດ້ 60 ພັນໂຕນ ຕໍ່ປີ, ຝ່າຍຢາສັກສົ່ງ
ຜະລິດໄດ້ 930.550 ຖົງຕໍ່ປີ, ຢາສັກສົ່ງ 3.800.000 ຫຼອດຕໍ່ປີ, ຢາເມັດ
183.300.000 ເມັດຕໍ່ປີ, ຢານ້ຳເຊື່ອມ 520.000 ຂວດແກ້ວ ຕໍ່ປີ ແລະ ຢາໃຊ້ສຳລັບພາຍນອກ
437.500 ຂວດແກ້ວ ຕໍ່ປີ. ໂຮງ ງານຜະລິດຢາເລກ 3 ເປັນລັດວິສາຫະກິດຂະ ໜາດກາງ,
ແຕ່ເຖີງຢ່າງໃດກໍດີ ເພື່ອຮອງຮັບການ ກ້າວເຂົ້າສູ່ປະຊາຄົມເສດຖະກິດອາຊຽນ ໃນປີ
2015 ນີ້, ທາງໂຮງ ງານຈະຕ້ອງເລັ່ງປັບຍົກສູງຄຸນ ນະພາບການຜະລິດໃຫ້ທັນສະໄໝ
ໂດຍມີແຜນຂະຫຍາຍໂຮງງານ ແລະ ຄົ້ນຄວ້າຜະລິດຢາໃຫ້ມີ ຫຼາຍກວ່າ 100 ຜະລິດຕະພັນ
ເພື່ອຈະແຂ່ງຂັນກັບສາກົນ ແລະ ຮັບໃຊ້ສັງຄົມໄດ້ຢ່າງທົ່ວເຖິງພຽງພໍ.
No comments:
Post a Comment